Në një aksion të gjerë të Policisë dhe Prokurorisë në Prizren, më 23.01.2026 janë ndaluar për 48 orë 109 komisionerë të dyshuar për manipulim të votave në zgjedhjet e 28.12.2025. Aksioni u zhvillua pas dyshimeve për parregullsi në Qendrën e Numërimit dhe Rezultateve (QNR).

Sipas Prokurorisë, të dyshuarit po hetohen për falsifikim të rezultateve të votimit, kanosje dhe dhënie ose marrje ryshfeti në lidhje me votimin. Në operacion u angazhuan katër prokurorë dhe rreth 200 zyrtarë policorë.

Prokuroria ka bërë të ditur se, brenda afateve ligjore, do të vlerësojë parashtrimin e kërkesës për sigurimin e prezencës së të pandehurve në procedurë.

“Pas autorizimit nga Prokuroria dhe në kuadër të këtij hetimi, pas intervistimit lidhur me dyshimet për kryerjen e veprave penale “Falsifikimi i rezultateve të votimit”, nga neni 216, “Kanosja” nga neni 181, “Dhënia ose marrja e ryshfetit të lidhje me votimin” nga neni 212 të KPRK-së, me urdhër të Prokurorit të Shtetit, janë ndaluar për 48 orë, njëqind e nëntë (109) persona”- thuhet në komunikatën e lëshuar më 21.01.2026.