Arlinda Sylaj Zekaj do të përcillet nesër për në banesën e fundit, pasi jeta e saj u ndërpre tragjikisht mbrëmjen e së dielës në Vitomiricë të Pejës.

Sipas njoftimit të familjarëve, ceremonia e varrimit do të mbahet të martën, më 27 tetor, në orën 15:00, në fshatin Radavc të Pejës.

Sipas raportimeve mediale, 49-vjeçarja kishte kërkuar ndihmën e institucioneve për shkak të problemeve dhe kërcënimeve që kishte raportuar në kuadër të marrëdhënieve familjare.

Vetëm pak ditë para ngjarjes, ajo i ishte drejtuar me shkrim Prokurorisë Themelore në Pejë, duke kërkuar trajtim urgjent të çështjes së saj. Në këtë kërkesë kishte shprehur shqetësimin për sigurinë personale dhe kishte kërkuar ndërhyrje institucionale.

Më 25 tetor, Arlinda ishte shoqëruar në stacionin policor pas raportimit të një rasti të dyshuar të dhunës në familje. Më pas, ajo ishte kthyer në shtëpi e shoqëruar nga një patrullë policore.

Pak minuta më vonë, autoritetet u njoftuan për një rast të rëndë në të njëjtin lokacion, ku 49-vjeçarja u gjet pa shenja jete.

I dyshuari ende në kërkim

Për vrasjen dyshohet Albert Sylaj, kunati i viktimës, për të cilin Policia e Kosovës ka publikuar njoftim kërkimi. Sipas informacioneve të raportuara, dyshohet se Arlinda u vra me sëpatë.

Nesër, familjarët dhe të afërmit do t’i japin lamtumirën e fundit Arlindës. Ndërsa ajo do të përcillet për në banesën e fundit, rasti i saj mbetet një thirrje e fortë për zbardhjen e plotë të ngjarjes dhe për përgjegjësi nga institucionet kompetente.