Erjon Vishkulli, 28-vjeçari i plagosur rëndë në sy gjatë protestës në Tiranë, po merr trajtim të specializuar në Itali, në përpjekje për të shpëtuar shikimin.

28-vjeçari u godit në syrin e majtë gjatë protestës së 24 tetorit në Tiranë. Pas operacionit urgjent në Spitalin e Traumës, ai u dërgua në Romë për trajtim të specializuar, ndërsa Prokuroria po heton rrethanat e plagosjes.

Sipas raportimeve mediatike, i riu u godit në syrin e majtë nga një objekt që dyshohet të jetë plumb gome. Pas transportimit në Spitalin Universitar të Traumës, ai iu nënshtrua një ndërhyrjeje urgjente, përpara se të dërgohej në Romë për trajtim të mëtejshëm.

Prokuroria kërkon të zbardhë rrethanat e plagosjes

Prokuroria e Tiranës ka regjistruar procedimin penal nr. 7806 të vitit 2026 për veprat penale “Shpërdorimi i detyrës” dhe “Kryerja e veprimeve arbitrare”.

Hetuesit kanë administruar pamjet filmike të siguruara nga Banka e Shqipërisë dhe kartelën mjekësore të të riut. Sipas Report TV, autoritetet shqiptare po kërkojnë bashkëpunimin e autoriteteve italiane për të siguruar objektin që do të hiqet gjatë ndërhyrjes, në mënyrë që të përcaktohet përbërja e tij dhe nëse bëhet fjalë për plumb gome.

Hetimi vijon për të sqaruar plotësisht rrethanat e ngjarjes dhe për të përcaktuar përgjegjësitë, nëse do të provohen shkelje nga punonjës të Policisë së Shtetit.