Rasti i vrasjes së Arlinda Zekajt në Vitomiricë të Pejës po përcillet me masa ndaj zyrtarëve që kishin përgjegjësi në trajtimin e rastit. Deri më tani, 11 zyrtarë policorë, përfshirë drejtues të strukturave policore në Pejë, si dhe kryeprokurorja e Pejës dhe prokurorja e rastit, janë suspenduar nga detyra.

Sipas gjetjeve preliminare të Inspektoratit Policor të Kosovës, urdhri mbrojtës për Zekajn nuk ishte dokumentuar si i ekzekutuar, ndërsa një urdhër i mëvonshëm ishte zbatuar me gjashtë ditë vonesë. Po ashtu, janë ngritur shqetësime për trajtimin e paralajmërimeve dhe vlerësimin e rrezikut ndaj saj.

Ndërkohë, i dyshuari për vrasjen, Albert Sylaj, është arrestuar dhe Gjykata Themelore në Pejë i ka caktuar një muaj paraburgim.

Në zhvillimin e fundit të rastit, Zyra e Kryeministrit ka pranuar raportet e Ministrisë së Drejtësisë dhe Ministrisë së Punëve të Brendshme lidhur me vrasjen e Arlinda Zekajt.

Të premten, më 30 tetor, në orën 09:00, Donika Gërvalla dhe Xhelal Sveçla do të mbajnë konferencë të përbashkët për media në Zyrën e Kryeministrit, ku pritet të flitet për raportet dhe hapat e mëtejmë lidhur me rastin.

Raportet pritet të shqyrtohen me fokus te lëshimet e mundshme institucionale dhe përgjegjësia e institucioneve që janë marrë me rastin. Mbetet të shihet se çfarë masash do të ndërmerren pas shqyrtimit të gjetjeve.